| Grétar Magnússon

Spáð í spilin

Næsti leikur okkar manna í deildinni er líklega stærsti leikur liðsins í deildinni í mjög langan tíma.  Manchester City menn koma í heimsókn og úrslitin munu koma til með að segja mikið til um hvaða lið verður meistari í maí.  Leikurinn hefst kl. 12:37 á sunnudaginn kemur.


Brendan Rodgers sagði á blaðamannafundi fyrr í dag að Daniel Agger væri búinn að ná sér af meiðslum sínum en hann missti af síðasta leik, sem var gegn West Ham.  Aðrir leikmenn eru heilir og tilbúnir í slaginn og því er ekki líklegt að Rodgers geri miklar breytingar frá liðinu í síðasta leik.  Hafa ber þó í huga að hann er duglegur að breyta uppstillingu á miðjunni til að mæta hættu sem mótherjinn skapar og því gæti alveg eins verið að hann breyti eitthvað til á miðjunni.

Manchester City hafa á gríðarlega stórum og góðum leikmannahóp að spila úr og þeirra besti maður, Sergio Aguero, er nýstiginn upp úr meiðslu og verður líklega með á sunnudaginn.  Hann er þeirra markahæsti maður á tímabilinu þrátt fyrir að hafa misst úr allmarga leiki vegna meiðsla.  Varnarmenn heimamanna þurfa því að vera vel á tánum ætli þeir sér að stöðva sóknarmenn City.  Ekki má gleyma David Silva sem spilar alltaf vel í holunni fyrir aftan sóknarmennina.  En Rodgers ætti að vera búinn að undirbúa sína menn vel fyrir átökin.


Það er ansi langt síðan liðin mættust síðast á Anfield í deildinni.  Það var nánar tiltekið fyrsti heimaleikur Rodgers með liðið og endaði leikurinn 2-2 þar sem gestirnir voru heppnir að sleppa með jafntefli.  Martin Skrtel skoraði fyrsta mark leiksins á 34. mínútu og staðan 1-0 í hálfleik.  Yaya Toure jafnaði metin á 63. mínútu en þrem mínútum síðar skoraði Suarez beint úr aukaspyrnu og kom heimamönnum í 2-1.  Varnarmistök Martin Skrtel á 80. mínútu urðu svo til þess að Carlos Tevez komst einn í gegn og jafnaði metin, þar við sat og Skrtel var gjörsamlega eyðilagður eftir leikinn.


Síðustu sex leikir þessara liða á Anfield hafa verið nokkuð jafnir en City hafa þó ekki unnið neinn þeirra, þrír hafa endað með jafntefli og þrír með sigri Liverpool.  Þó hafa síðustu tveir leikir liðanna á Anfield endað með jafntefli, síðasti sigurleikur okkar manna gegn City á heimavelli kom 11. apríl árið 2011 og endaði leikurinn 3-0.  Andy Carroll skoraði tvö markanna og Dirk Kuyt eitt, liðið var þá undir stjórn Kenny Dalgish.  Sé litið til síðustu sex leikja gegn þeim í öllum keppnum hafa okkar menn aðeins unnið einn leik, þrír hafa tapast og tveir endað með jafntefli.


Varla þarf að nefna við nokkurn mann hvernig staða liðanna er í deildinni.  Liverpool sitja á toppnum með 74 stig eftir 33 leiki.  Manchester City eru í 3. sæti með 70 stig en hafa aðeins leikið 31 leik það sem af er tímabils.

Búast má við gríðarlega góðri stemmningu á leiknum því mikil spenna er í Liverpool borg og víðar auðvitað.  Ef stemmningin var góð í síðasta heimaleik gegn Tottenham þá verður hún ekki síðri núna.

Spáin að þessu sinni er svona:  Leikurinnn verður hraður og bæði lið munu reyna að nýta sóknarstyrk sinn til hins ýtrasta.  Okkar menn hafa sigur með einu marki 3-2 og gott ef það verður ekki einhver dramatík í spilunum eins og nánast er venja þegar Liverpool á í hlut.

Fróðleikur:

- Steven Gerrard jafnar þrjá aðra leikmenn félagsins í fjölda leikja gegn City á sunnudaginn kemur.

- Leikurinn verður nr. 25 hjá Gerrard gegn City, í þeim hefur hann skorað 6 mörk.

- Luis Suarez er markahæstur í deildinni með 29 mörk.

- Eins og áður hefur liðið skorað flest mörk allra í deildinni eða 90 talsins.

- Eftir 33 leiki á sama tímabili í fyrra sat liðið í 7. sæti með 50 stig og hafði skorað 59 mörk.

Hér má sjá leikmenn Liverpool æfa á Melwood fyrir stórleikinn.

TIL BAKA
Nýlegar fréttir
Fleiri fréttir
Fréttageymslan