| Sf. Gutt

Sigurinn sýndi liðsandann!

Jordan Henderson segir að sigurinn harðsótti á móti West Ham United í gær hafi endurspeglað þann góða liðsanda sem er í liði Liverpool um þessar mundir.

,,Þetta var leikur liðsheildarinnar. Liðið hefur lagt mjög hart að sér alla leiktíðina og þessi leikur var ekkert öðruvísi hvað það varðar. Við erum að leggja gríðarlega hart að okkur. Luis gerði frábærlega í aðdraganda fyrsta marksins eftir að hafa fengið glæsilega langa sendingu yfir vörnina frá Stevie. Luis skilaði sínu og fékk víti eftir að dæmd var hendi. Svo í seinna markinu þá var það Lucas sem átti stórgóða sendingu á Flanno sem komst í boltann rétt á undan markmanninum."

,,Heilt yfir þá erum við mjög ánægðir með hvernig við spiluðum og að hafa náð þremur stigum. Mér fannst við ná virkilega góðri stjórn á leiknum eftir leikhlé, ógnuðum  nokkrum sinnum og hefðum getað skorað nokkur mörk til viðbótar. Hinu megin á vellinum náðum við að verjast föstu leikatriðunum og hættunni í loftinu mjög vel allan leikinn. Við erum því mjög ánægðir."

Liverpool á fimm leiki eftir á keppnistímabilinu. Ef allt gengur upp í þeim leikjum gæti Englandsmeistaratitillinn komið á Anfield í 19. sinn. Jordan segir að leikmenn Liverpool muni koma í hvern leik, sem eftir er, á sama hátt og þá sem búnir eru.

,,Það er mjög gott sjálfstraust hjá okkur. Við verðum bara að halda áfram að æfa vel, taka hvern leik þegar að honum kemur, halda áfram að gera það sem við höfum verið að gera og fara út á völl og spila vel."

TIL BAKA
Nýlegar fréttir
Fleiri fréttir
Fréttageymslan