| Sf. Gutt

Markvörður aldrei varið víti í fyrsta leik!

Það hefur aldrei áður gerst í sögu Liverpool að markmaður verji vítaspyrnu í fyrsta leik sínum fyrir félagið! Simon Mignolet skráði því nafn sitt rækilega í annála Liverpool þegar hann varði víti á síðustu mínútu leiks Liverpool og Stoke City í gær. Markmaður Liverpool hefur sem sagt aldrei byrjað betur í fyrsta leik ef miðað er við vítaspyrnuvörslu og auðvitað tryggði hann sigurinn í leiknum!

Það má til gamans nefna það að fyrir einni öld, 1. janúar 1013, lék Elisha Scott sinn fyrsta leik í aðalliði Liverpool þegar hann stóð í markinu á móti Newcastle United á St. James Park. Leiknum lauk án marka og Elisha átti stóran þátt í því að Liverpool hélt hreinu. Svo vel lék hann að eftir leik gerðu forráðamenn Newcastle kauptilboð í Norður Írann! Tilboðinu var ekki tekið og Elisha átti síðar eftir að verða einn ef ekki allra besti markmaður í sögu Liverpool! Hann lék 469 leiki með Liverpool og varð enskur meistari árin 1922 og 1923. Það kemur í ljós hvort Simon verður eitthvað í líkingu við Elisha en byrjunin hjá honum gat ekki verið betri.

TIL BAKA
Nýlegar fréttir
Fleiri fréttir
Fréttageymslan