Andy Carroll seldur

Í dag var formlega tilkynnt um sölu á Andy Carroll til West Ham United. Andy kom til félagsins frá Newcastle United, þar sem hann ólst upp, á síðasta degi félagaskiptagluggans í janúar 2011. Liverpool borgaði 35 milljónir punda fyrir kappann. Hann spilaði sinn fyrsta leik er hann kom inná gegn Manchester United þann 6. mars.  Andy spilaði alls sjö leiki það tímabil og skoraði tvö mörk, bæði í 3:0 sigri á Manchester City.


Tímabilið eftir spilaði hann alls 47 leiki og skoraði níu mörk, það mikilvægasta var sigurmark gegn Everton í undanúrslitum FA bikarsins á Wembley. Það mark kom Liverpool í úrslitaleik á móti Chelsea. Sá leikur tapaðist 2:1 og skoraði Andy mark Liverpool eftir að hafa komið inn á sem varamaður. Aðeins undramarkvarsla Petr undir lok leiksins kom í veg fyrir að Andy jafnaði leikinn. 

Þegar Brendan Rodgers tók svo við sem knattspyrnustjóri síðasta sumar fóru strax á kreik sögusagnir um að hann sæi Carroll ekki fyrir sér í sínum plönum og lék hann aðeins tvo leiki í upphafi leiktíðarinnar. Fór það svo að Carroll var lánaður til West Ham á lokadegi félagaskiptagluggans. Þótti það mjög misráðið því þar eftir var Luis lengst af eini sóknarmaður Liverpool, með einhverja reynslu, fram að áramótum. Hjá West Ham skoraði hann sjö mörk í 24 leikjum en hann var töluvert frá vegna meiðsla.

 

Andy Carroll vann einn titil með Liverpool en hann varð Deildarbikarmeistari 2012. Hann var í byrjunarliði Liverpool í úrslitaleiknum á móti Cardiff en lék ekki allan leikinn. Alls spilaði Andy 58 leiki fyrir Liverpool og skoraði 11 mörk.

Í sumar hafa svo samningaviðræður við West Ham gengið vel og í dag var formlega tilkynnt um söluna. Kaupverðið er talið vera um 15 milljónir punda og gæti mögulega risið upp í 17,5 milljónir með bónusum. Andy líkaði vel hjá Liverpool og vonaðist til að fá möguleika á að koma aftur til félagsins og sanna sig. Brendan Rodgers hafði þó ekki sama áhuga á því og nú er stuttum ferli Andy hjá Liverpool lokið.

Hér má kynna sér allt um feril Andy Carroll á LFCHISTORY.NET.