Luis Alberto næsti maður inn?

Liverpool Echo segist hafa fyrir því áreiðanlegar heimildir að Liverpool sé við það að ganga frá kaupum á hinum tvítuga Spánverja, Luis Alberto frá Sevilla.

Nafn Alberto hefur áður komið upp í leikmannaslúðri sumarsins en ekki með eins afgerandi hætti og Echo slær upp í dag.

Þessi ungi og efnilegi sóknartengiliður var í láni hjá Barcelona í vetur og þótti standa sig vel með B liði félagsins. Þrátt fyrir það nýtti Barcelona sér ekki kauprétt í samningi milli félagsins og Sevilla.

Luis Alberto þykir mikið efni. Hann er sagður njóta sín best í holunni fyrir aftan sóknarmennina þar sem góðir sendinga- og skothæfileikar hans valda oftar en ekki miklum usla.

Hann lék 37 leiki með Barcelona B í vetur og skoraði í þeim 11 mörk. Þar að auki átti hann 17 stoðsendingar. Hann segist sjálfur hafa tekið miklum framförum og vera tilbúinn til þess að taka næsta skref. Hvort það skref verður í átt til Bítlaborgarinnar í norðri eða eitthvert allt annað verður að koma í ljós, en ef heimildir Liverpool Echo reynast réttar þá er þetta næsti maður inn hjá Liverpool.