Ekkert má út af bera!!!

Það má ekkert út af bera! Í áhugaverðu viðtali ræðir Brendan Rodgers, framkvæmdastjóri Liverpool, um verkefni sumarsins, hvernig á að bæta Liverpool liðið og koma því í baráttu bestu liðanna! Norður Írinn telur að liðið hafi bætt sig á fyrstu leiktíð sinni frá þeirri á undan en það þarf meira til að koma því í baráttu um titla.

,,Það voru ákveðin batamerki á fyrstu leiktíð minni. Það skiptust vissulega á skin og skúrir en þegar litið er á staðreyndir þá skoruðum við 71 mark á móti 47 leiktíðina á áður en ég kom. Ég vona að við getum skorað enn fleiri næst. Liðið þótti mjög sterkt varnarlega á síðasta ári en núna fengum við aðeins þremur mörkum meira á okkur. Svo ef við skoðum tölfræðina og hvernig við lékum þá höfum við tekið framförum."

,,Ég hef trú á því að við getum bætt okkur enn meira og við verðum einfaldlega að gera það því við viljum veita öðrum liðum samkeppni. Ég hef trú á því að við getum það en það verður erfitt því um leið og við viljum bæta okkur þá erum við að keppa við önnur félög sem hafa miklu meira fjármagn til að styrkja sig. En ég held að við höfum byggt mjög góðan grunn. Það er ekki mitt verk að leita eftir afsökunum. Mitt verk er að leita lausna til að þoka okkur áleiðis fram á við og ég held að við verðum ekki ýkja langt frá þeim bestu."

Liverpool hefur marga góða leikmnen í sínum röðum en það þarf fleiri slíka til að styrkja liðshópinn. Brendan er búinn að ákveða hvers konar menn hann þarf til að bæta liðið. Hann liggur ekkert á því hvaða stöður þarf helst að styrkja. En nýju mennirnir verða að láta að sér kveða um leið og þeir mæta á svæðið!

,,Við þurfum einn eða tvo miðverði og ég myndi vilja að liðið skoraði 20 mörkum meira en síðast. Þess vegna er ég að leita að öðrum sóknarmanni sem gæti skapað usla hjá andstæðingunum og öðrum sókndjörfum miðjumanni. Þetta þurfum við að gera og sérstaklega ef við eigum að geta lánað unga stráka, á næsta keppnistímabili, til að þeir geti öðlast meiri reynslu. Þetta verður ekki auðvelt því við getum ekki leyft okkur að gera mistök. Við viljum halda þeim krafti sem kominn var í liðið og þess vegna er þetta félagaskiptatímabil gríðarlega mikilvægt fyrir okkur. Við verðum að gera okkar besta til að ná í réttu mennina því mennirnir sem við kaupum verða að að vera tilbúnir í slaginn og láta að sér kveða um leið og þeir byrja að spila fyrir okkur."

Brendan Rodgers hittir naglann á höfuðið í þessu viðtali. Um leið endurómar hann orð þeirra manna sem voru á undan honum í starfi framkvæmdastjóra Liverpool. Þeir Gerard Houllier, Rafael Benítez, Roy Hodgson og Kenny Dalglish höfðu uppi svipuð orð. Þeir reyndu sitt besta í því sama. Sem sagt að bæta liðið, kaupa réttu leikmennina og færa Englandsmeistaratitilinn heim á Anfield. Misjafnlega hefur tekist upp síðustu árin í þessum efnum og nú er komið að Brendan Rodgers. Einfalt mál eða þannig!