Rafa bætir titli í safnið!

Rafael Benítez bætti titli í safn sitt í kvöld þegar Chelsea vann Evrópudeildina. Flest spjót hafa staðið á honum eftir að hann var ráðinn þangað en hann getur nú yfirgefið Chelsea, eins og til stóð, nokkuð sáttur.

Trúlega hafa margir stuðningsmenn Liverpool glaðst fyrir hönd Rafa í gærkvöldi þegar hann stóð uppi sem sigurvegari. Chelsea mætti Benfica frá Portúgal í úrslitaleik Evrópudeildarinnar sem fór fram í Amsterdam. Benfica var miklu betra liðið í fyrri hálfleik en ekkert hafði verið skorað í hálfleik. Fernando Torres kom Chelsea svo yfir gegn gangi leiksins en Oscar Cardozo jafnaði úr víti. Allt leit út fyrir framlengingu þegar Branislav Ivanovic skoraði sigurmarkið með skalla eftir horn þegar komið var fram í viðbótartíma. Ótrúleg endalok! 

Chelsea heldur því báðum Evrópubikurunum á sama tíma og slíkt hefur ekki gerst áður. Evrópubikarinn er enn í vörslu Chelsea frá því í fyrra. Chelsea varð um leið fyrst enskra liða til að vinna allar Evrópukeppnirnar. Evrópubikarinn, Evrópukeppni bikarhafa, Evrópudeildina og Stórbikar Evrópu.

Tveir fyrrum lærisveinar Rafael Benítez voru í liðshópnum í gærkvöldi. Fernando var auðvitað með eins og áður kom fram og Yossi Benayoun var meðal varamanna. Að auki er Bolo Zenden í þjálfaraliði Chelsea en Rafa réði hann til sín þegar hann var ráðinn til Chelsea.

Rafael Benítez hefur áður unnið þessa keppni en hann stýrði Valencia til sigurs í henni vorið 2004 en þá um sumarið tók hann við Liverpool. Árið eftir vann hann svo Evrópubikarinn og Stórbikar Evrópu með Liverpool eins og okkur, stuðningsmönnum Liverpool, er enn í fersku minni.