Carra kvaddur - Roy Evans

Roy Evans var sá fyrsti af sex framkvæmdastjórum Liverpool sem valdi Jamie Carragher í aðalliðið. Roy setti strákinn fyrst inn á í Deildarbikarleik á móti Middlesbrough í janúar 1997. Liverpool tapaði þeim leik 2:1 en Jamie kom svo aftur inn á sem varamaður í 0:0 jafntefli gegn West Ham United á Anfield Road nokkrum dögum seinna. Í þriðja leiknum, helgina eftir, skoraði Jamie eftir nokkrar mínútur þegar Liverpool vann Aston Villa 3:0. Jamie lék svo ekkert meira á leiktíðinni!

Á næstu leiktíð, 1997/98, lék Jamie talsvert og festi sig í sessi í aðalliðinu. Venjulega lét Roy Jamie spila aftarlega á miðjunni. Roy þekkir Jamie frá fystu tíð og hefur fylgst með honum síðan. Hann segir að það verði enginn annar Jamie Carragher!

,,Við þurfum að fá einhvern til að koma í staðinn fyrir Jamie Carragher og Brendan tæpti á því á blaðamannafundinum að hann þyrfti að leita mikið og lengi til að fá einhvern í hans stað. En það er bara ekki hægt að finna einhvern leikmann sem er eins og Jamie. Það verður hægt að finna einhvern öðruvísi leikmann í hans stað en það er ekki til annar Jamie einhvers staðar."

,,Það er hægt að fá einhvern öðruvísi. Miðvörð sem er annarar tegundar og auðvitað þarf annan mann. Það þarf að finna einhvern sem getur spilað með Daniel Agger, Martin Skrtel og hinum. Það eru líka nokkrir ungir strákar hérna sem ætla sér að komast í liðið. Við verðum að fylla skarð Jamie bæði hvað varðar persónuleika hans og hæfileika."

Þetta er auðvitað hárrétt sem Roy Evansr segir hér. Um leið má öllum ljóst vera að það verður ekki auðvelt að fylla skarð hans. Það er jú ekki til neinn annar Jamie Carragher!