| Sf. Gutt

Hávaðinn getur skipt sköpum í dómkirkjunni!

Brendan Rodgers segir að hávaðinn sem stuðningsmenn Liverpool geta myndað gæti skipt sköpum í kvöld þegar rússnesku meistararnir koma í ,,dómkirkjuna" til að verja forystu sína úr fyrri leiknum fyrir viku. Zenti vann þá 2:0 og Liverpool þarf að vinna með þriggja marka mun sé ekki reiknað með vítaspyrnukeppni. Leikmenn Liverpool hafa biðlað til stuðningsmanna liðsins síðustu daga um hjálp og Brendan Rodgers segir að þeir geti skipt sköpum.

,,Hávaðinn skiptir miklu máli. Það verða 40.000 hérna en með hávaðanum sem þeir mynda gæti það verið eins og 100.00 manns væru á stæðunum. Það er úf af þessu sem Anfield er einstakur leikvangur og þess vegna er þetta knattspyrnufélag þekkt um allan heim."

,,Leikmennirnir úti á vellinum fylla stuðningsmennina stolti og ég er viss um að stuðningsmennirnir verða eins og einn maður og saman gætum við gert þetta einstakt. Saga félagsins byggir á glæstum Evrópukvöldum. Auðvitað vildum við að staðan í rimmunni væri betri fyrir okkur núna en þetta er mjög spennandi verkefni fyrir okkur."

,,Áhorfendur leika stórt hlutverk. Við höfum séð þá hreinlega vinna leiki hérna í gegnum tíðina. Við þurfum nú á þeim að halda sem aldrei fyrr. Þessi leikvangur er þekktur úti um allan heim. Eitt af því fyrsta sem ég gerði fyrir blaðamannafundinn, þar sem ég var kynntur sem framkvæmdastjóri, var að ganga um leikvanginn og upplifa andrúmsloftið þar. Þetta er einstakur staður sem er á við dómkirkju!"

Virki, Musteri eða dómkirkja! Anfield er einstakur staður og vonandi fer Evrópukvöldið í kvöld í annála fyrir sögulega endurkomu. Fulltrúar rússneska bjarnarins munu standa til varnar en við væntum þess að Rauði herinn frá Liverpool hafi betur!
 
TIL BAKA
Nýlegar fréttir
Fleiri fréttir
Fréttageymslan