| Grétar Magnússon

Skora meira þegar ég kemst í 100% leikform

Daniel Sturridge segist munu vera beittari fyrir framan markið þegar hann hefur náð 100% leikformi.  Hann þurfti þó bara sjö mínútur til að opna markareikning sinn hjá félaginu.


Hann fékk þó fleiri færi til að bæta við mörkum en nýtti þau ekki, var það aðallega markverði Mansfield að kenna en hann varði vel frá nýjasta sóknarmanni félagsins.  Sturridge er þó fullviss um að hann muni nýta færin betur síðar.

,,Ég er ekki alveg orðinn nógu beittur fyrir framan markið," sagði hann í viðtali við Liverpool Echo.

,,Ég fór illa með nokkur færi en þegar ég er kominn í betra leikform vona ég að ég geti sett boltann í markið frekar en að láta verja frá mér.  Ég var orðinn svolítið þreyttur úti á vellinum vegna þess að ég hef lítið spilað og æft síðustu mánuði.  En ég er þakklátur stjóranum fyrir að gefa mér næstum 60 mínútur."

,,Ég hef ekki æft mikið.  Ég hef aðeins æft þrisvar sinnum með strákunum og svo var létt æfing á laugardaginn fyrir leikinn.  Sendingin frá Jonjo var frábær - hann sá sendinguna og boltinn var á hárréttum stað.  Hann gerði mér frekar auðvelt fyrir þannig að ég gat tekið skotið í fyrstu snertingu.  Við höfum ekki haft mikinn tíma til að vinna saman en við vorum þarna báðir á sömu bylgjulengd.  Við náum vel saman innan og utan vallar."

,,Allir strákarnir í liðinu hafa verið frábærir við mig og gert mér auðvelt fyrir að aðlagast þessa síðustu daga.  Ég vil þakka þeim fyrir að hafa boðið mig velkominn.  Ég hlakka til að spila með þeim um mörg ókomin ár."

Sturridge, sem hefur unnið FA Bikarinn tvisvar sinnum með Chelsea, viðurkennir að hann hafi verið stressaður fyrir leikinn á sunnudaginn.  En að leik loknum hafi hann verið mjög ánægður.


,,Þetta var ánægjulegt.  Það var gott að kynnast liðsfélögunum betur og gott að spila uppá leikformið.  Þetta var fullkomin byrjun fyrir mig að skora í fyrsta leik.  Ég var stressaður fyrir leikinn.  Það var nokkuð skrýtið því ég verð venjulega ekki stressaður."

,,Fólk mun kannski hugsa af hverju ég var stressaður fyrir leik gegn Mansfield.  En það er einmitt í þessum leikjum þar sem búist er við því að maður skori og maður verður að skora.  Ég er ánægður með sigurinn.  FA Bikarinn hefur verið góð keppni fyrir mig undanfarin ár og ég er ánægður með að hafa hjálpað liðsfélögum mínum til að vinna leikinn."

Sturridge var einnig spurður útí markið sem Luis Suarez skoraði en markið var umdeilt þar sem boltinn fór í hendina á Suarez og þaðan í markið.  Hann vill hinsvegar einblína á þá staðreynd að liðið er nú komið í næstu umferð keppninnar.

,,Ég sá atvikið ekki nógu vel frá bekknum og ég hef ekki séð það aftur," sagði Sturridge.  ,,Ég sá ekki nákvæmlega hvað gerðist en markið stóð og við erum komnir áfram í næstu umferð - það er það sem skiptir máli."

,,Ég verð að hrósa Mansfield vegna þess að þeir sóttu að okkur í lokin.  Þetta er FA Bikarinn og í þessari keppni getur allt gerst.  Allir búast við því að við vinnum lið í utandeildinni en svona er knattspyrnan.  Hún er full af óvæntum atvikum og við erum hæstánægðir með að vera komnir áfram."



TIL BAKA
Nýlegar fréttir
Fleiri fréttir
Fréttageymslan