Joe Cole til West Ham United

Í dag var það staðfest opinberlega að Joe Cole hefur yfirgefið Liverpool og haldið heim á leið til West Ham United en þar hóf hann feril sinn. Hann lék með West Ham frá 1999 til 2003 þegar hann fór til Chelsea. Joe kom á frjálsri sölu frá Chelsea sumarið 2010 og ekki er hægt að segja að hann hafi náð að festa sig í sessi hjá félaginu. Á síðasta keppnistímabili var Joe í láni hjá Lille í Frakklandi þar sem honum gekk vel.
Þó má reyndar segja Cole til varnar að hann hafi staðið sig ágætlega í þeim leikjum sem hann spilaði í á þessu tímabili.  Hann skoraði til dæmis mikilvægt jöfnunarmark gegn West Ham á Upton Park í leik sem endaði 3-2 Liverpool í vil núna fyrir jólin. Athygli vakti að hann vildi ekki fagna markinu af virðingu við gamla félagið sitt. Einnig skoraði hann gott mark í 2-2 jafntefli gegn Young Boys á Anfield í Evrópudeildinni. Það mark hjálpaði Liverpool til að komast áfram í Evrópudeildinni.

Ekki er um eiginlega sölu frá félaginu að ræða heldur er Cole leystur undan samningi og fær hann skv. fréttum væna greiðslu fyrir það.  En engu að síður er hann ekki lengur á launaskrá og það ætti að muna um þá upphæð í heildarlaunagreiðslum félagsins því hann var með mjög hátt kaup. Joe Cole spilaði alls 42 leiki á þessu tveimur og hálfa ári og skoraði fimm mörk.

Joe er hinn ánægðasti með að vera kominn aftur til heim á Upton Park. ,,Þetta eru frábær vistaskipti fyrir mig. Hér lærði ég mitt fag og ég er mjög ánægður með að hafa aftur fengið tækifæri til að koma hingað. Mér finnst að ég skuldi félaginu svolítið því það er West Ham að þakka að ég varð knattspyrnumaður."

Hér má horfa á viðtal við Joe sem tekið var eftir leik Liverpool og West Ham United.

Hér má kynna sér allt það helsta um feril Joe Cole hjá Liverpool á LFChistory.net.