Í nærmynd

Þegar upp var staðið í vor og leiktíð lokið var það mál flestra að Slóvakinn Martin Skrtel hefði verið besti leikmaður Liverpool. Vissulega var hann mjög sterkur og líklega sýndu ekki margir meiri stöðugleika. Hann náði mjög vel saman við Daniel Agger í hjarta varnarinnar og hefur sjaldan verið betri.

Martin Skrtel kom til Liverpool í janúar 2008 og hefur alltaf verið sterkur fyrir. Hann hefur þó tekið miklum framförum á síðustu tveimur leiktíðum og er nú orðinn fastur í sessi í aðalliðinu. Það er því mjög svo við hæfi að líta á Martin Skrtel í nærmynd.