Jafntefli varaliðsins

Það er alltaf nóg af mörkum þegar varalið Liverpool spilar. Þetta brást ekki í dag þegar liðið heimsótti Sunderland. Svörtu kettirnir leiða norðurriðil varaliðsdeildarinnar og höfðu fyrir þennan leik unnið alla heimaleiki sína. Sigurgangan endaði í dag þegar 3:3 jafntefli varð staðreynd.
 
Liverpool komst yfir þegar bakvörðurinn Jon Flanagan skoraði af stuttu færi. Suso átti þá skot í stöng og Jon fylgdi á eftir. Heimamenn voru ekki ánægðir með þetta og svöruðu með þremur mörkum. Þeir komust á bragðið með ódýrri vítaspyrnu og svo komu tvö önnur mörk og staðan 3:1 í hálfleik. 

Piltar Rodolfo Borrell lögðu þó ekki árar í bát og Conor Coady lagaði stöðuna með skalla eftir horn. Ungverjinn Krisztian Adorjan jafnaði svo leikinn þegar fyrirgjöf hans frá vinstri sveif undan vindi í markið. Staðan orðin 3:3 og litlu munaði að Liverpool næði sigri þegar Suso lék á tvo leikmenn og átti svo þrumuskot utan vítateigs sem small í þverslá.

Góð úrslit þegar upp var staðið því sem fyrr segir hafði Sunderland unnið alla heimaleiki sína á leiktíðinni og Liverpool náði að vinna upp tveggja marka forskot. 

Liverpool: Belford, Flanagan, Robinson, Sama, Wisdom, Coady, Suso, Roberts, Eccleston, Adorjan og Sterling. Varamenn: Mendy, Ward, McGiveron, Roddan og Ngoo.