| Heimir Eyvindarson

Ekkert að sjá á upptökum Sky Sports

Samkvæmt breska blaðinu The Guardian hefur Sky Sports ekki fundið neitt í upptökum af leiknum á laugardaginn sem bendir til þess að ásakanir Patrice Evra á hendur Luis Suarez eigi við rök að styðjast.

Eins og kunnugt er ásakaði Evra Suarez um að hafa kallað sig negra a.m.k. 10 sinnum í leik Liverpool og Manchester United á laugardaginn.

Evra lét einnig hafa það eftir sér að hann væri þakklátur fyrir þann fjölda sjónvarpsvéla sem var á vellinum á laugardaginn, því það hljóti að sjást á einhverjum upptökum að Luis Suarez hafi virkilega notað ,,n-orðið".

Samkvæmt frétt The Guardian hafa sérfræðingar Sky Sports nú farið í gegnum allar sínar upptökur af leiknum og þar er ekkert að sjá sem bendir til þess að ásakanir Evra séu á rökum reistar.

Rannsókn enska knattspyrnusambandsins á því hvort það geti verið að Suarez hafi gerst sekur um kynþáttafordóma og niðrandi ummæli í garð fyrirliða Manchester United á laugardaginn er nú hafin, en samkvæmt frétt The Guardian er ekki búist við úrskurði eða niðurstöðu í málinu fyrr en í næstu viku.

Sé það rétt að ekkert sé að finna í upptökum Sky af leiknum sem styðji frásögn Evra getur Suarez andað léttar. Í bili a.m.k.





TIL BAKA
Nýlegar fréttir
Fleiri fréttir
Fréttageymslan