Bellamy er góður kostur fyrir okkur

Kenny Dalglish vill meina að Craig Bellamy sé betri leikmaður núna en þegar hann kom til Liverpool sumarið 2006. Hann sé í sama formi, en klókari.

,,Þegar Craig kom hingað í fyrra skiptið þá sagðist hann vera aðdáandi Liverpool og að hann hefði alltaf óskað sér að spila fyrir félagið. Nú fær hann tækifæri til þess á nýjan leik."

,,Því eldri sem þú verður, því færri möguleikar bjóðast þér sem leikmanni. Hann ákvað að grípa þetta tækifæri. Hann hefur í raun fórnað miklu til þess að eiga kost á því að spila aftur fyrir Liverpool. Bæði fjárhagslega og á ýmsan annan hátt. Það sýnir hversu mikla þýðingu Liverpool hefur fyrir hann", segir Kenny Dalglish.

,,Ég vil meina að hann sé betri leikmaður núna en þegar hann var hjá félaginu í fyrra skiptið. Hann er frábær á æfingum, hefur enn mikinn hraða og er alltaf ógnandi. Hann er í góðu líkamlegu formi og er þess utan mun skynsamari og útsjónarsamari en hann var sýnist mér."

,,Hann hefur vissulega mikið skap, en mér dettur ekki í hug að reyna að að breyta því. Svoleiðis gerir maður aldrei. Ég hef alltaf verið mjög hrifinn af Craig sem leikmanni og er viss um að hann á eftir að reynast okkur mjög vel."

,,Hann er ekki í mikilli leikæfingu. Einu leikirnir sem hann hefur spilað að undanförnu eru tveir landsleikir og svo einhverjir leikir með varaliðinu. En ég horfði á hann spila með Wales á móti Svartfjallalandi á dögunum og hann var á fullri ferð á lokamínútunum þannig að ég held að það sé ekkert vandamál með formið á honum."