Sá danski má fara!

Christian Poulsen má fara frá Liverpool ef marka má orð umboðsmanns hans. Staðarblaðið Liverpool Daily Post greinir frá þessu og vitnar í Jorn Bonnesen umboðsmann danska landsliðsmannsins.
 
,,Liverpool hefur gefið út að ekki sé víst að Christian fái að spila jafn mikið og hann vill. Þeir segjast hafa skilning á því að við séum að reyna að finna nýtt félag handa Christian. Félög hafa sýnt áhuga og við erum að skoða þá möguleika sem eru fyrir hendi."

Christian Poulsen hefur ekki verið í liðshópi Liverpool í fyrstu tveimur leikjum liðsins. Hann spilaði eitthvað af æfingaleikjunum og skoraði fyrsta mark sumarsins þegar Liverpool vann kínverska liðið Guangdong 4:3. 

Christian Poulsen kom til Liverpool fyrir einu ári þegar hann var keyptur frá Juventus. Það má telja mjög líklegt að hann verði farinn frá Liverpool þegar lokar fyrir félagaskipti þegar ágúst rennur sitt skeið. Hann hefur getið sér gott orð í Þýskalandi, Spáni og Ítalíu svo það er örugglega áhugi á Dananum einhvers staðar.