Ungliði lánaður

Danski markmaðurinn Martin Hansen hefur verið sendur í lán. Martin mun næstu fjórar vikurnar eða svo leika með Bradford City sem er í fjórðu efstu deild. Um er að ræða svokallað neyðarlán en mögulegt er að lánstíminn verði lengri. Martin hefur enn ekki leikið opinberan aðalliðsleik en hann kom við sögu í báðum leikjunum í Asíuferðinni um daginn. Hann hefur verið nokkrum sinnum varamaður hjá aðalliðinu.  

Liverpool hefur þar með lánað tvo markmenn á skömmum tíma því Ungverjinn Peter Gulacsi var á dögunum lánaður til Hull City þar sem hann verður á komandi leiktíð. Liverpool fékk auðvitað Alexander Doni í markið um daginn og ljóst er að hann verður fyrsti varamarkmaður í næstu sparktíð.