Samið um kaupverð á Charlie Adam

Tilkynnt var nú rétt í þessu á opinberri heimasíðu félagsins, Liverpoolfc.tv, að samningar hafi tekist við Blackpool um kaupverðið á Charlie Adam. Ekki er kaupverð gefið upp en einhverjir fjölmiðlar telja að það sé um átta milljónir sterlingspunda.

Charlie hefur þar með kvatt Blackpool. Hann mun nú gangast undir læknisskoðun á Melwood síðar í dag og ræða um sín persónulegu kaup og kjör.

Sagan um vistaskipti Charlie Adam til Liverpool hefur verið löng. Segja má að hún hafi hafist fyrir alvöru í janúar þegar ítrekuðum tilboðum Liverpool í skoska landsliðsmanninn var hafnað. Því geta allir aðdáendur Liverpool glaðst yfir því að sögunni virðist í þann veginn vera að ljúka.

Hér eru myndir, af Liverpoolfc.tv, sem voru teknar þegar Charlie og samlandi hans Kenny Dalglish komu til Melwood síðdegis í dag.