Í grunnbúðum á leið á toppinn!

Tom Warner stjórnarformaður Liverpool telur að allt sé á réttri leið hjá félaginu. Hann segir þó að löng leið sé fyrir höndum og nú séu menn í grunnbúðum áður en lagt sé í hann upp á toppinn.

,,Ég tel að það sé mikilvægt að við höldum stefnu okkar í rétta átt. Mín tilfinning er sú að ef við værum að leggja upp í göngu á fjallstopp þá myndum við núna vera í grunnbúðum en værum búnir að ná stöðugleika og undirbúa uppgönguna."

,,Það er löng leið eftir og við viljum alls ekki lofa upp í ermina á okkur. Ég held að stuðningsmennirnir finni fyrir nýrri bjartsýni hjá félaginu en við höfum ekki afrekað neitt ennþá sem komið er. Okkur miðar þó í rétta átt."
 
,,Ég finn fyrir samstöðu og ég hef þá trú að framtíðin verði björt. En það er þó alveg á hreinu að það er löng ferð fyrir höndum. Ég vil koma því áleiðis til stuðningsmannanna að hafa skilning á stöðu mála og sýna þolinmæði á meðan okkur miðar í rétta átt."

Það eru án vafa margir sem stefna á fjöll í sumar og líklega ná flestir settum mörkum. Fjallgangan sem forráðamenn Liverpool eru lagðir af stað í er rétt að byrja en við vonum að gangan sú endi á toppnum!