Robbie Fowler æfir með Liverpool

Þetta er ekkert apríl gabb. Gamall kunningi er mættur á fornar slóðir. Enginn annar en Robbie Fowler er farinn að æfa með Liverpool! Robbie er þó ekki genginn til liðs við Liverpool í þriðja sinn því hann hefur fengið leyfi til að æfa með gamla liðinu sínu til að halda sér í þjálfun eftir að hann kom frá Ástralíu. 

Robbie æfði með varaliðshópnum í gær og Pep Segura, þjálfari varaliðsins sagði það hafa verið frábært að hafa kappann á æfingunni. Hann sagði Robbie hafa verið frábæra fyrirmynd fyrir ungu piltana.

Robbie Fowler hefur síðustu mánuði verið að læra þjálfun. Upp á síðkastið hefur hann verið að aðstoða við æfingar hjá M K Dons og Bury og hver veit nema hann eigi eftir að þjálfa hjá Liverpool áður en yfir lýkur.