Gerrard farinn að æfa

Steven Gerrard er farinn að æfa aftur eftir meiðslin og Kenny Dalglish bindur vonir við að fyrirliðinn verði orðinn leikfær á laugardaginn.

Liverpool mætir lærisveinum Roy Hodgson í WBA á útivelli á laugardaginn og vonir stuðningsmanna Liverpool um það að Steven Gerrard geti tekið þátt í þeim leik glæddust í dag, þegar fregnir bárust af því að fyrirliðinn hefði  mætt á æfingu á Melwood.

Gerrard fór í aðgerð fyrir tveimur vikum og fyrirfram var búist við því að hann yrði jafnvel frá í mánuð, en batinn hefur verið hraðari en áætlað var. Kenny Dalglish er að vonum ánægður með þróun mála.

,,Steven hefur lagt mikið á sig til þess að jafna sig sem fyrst eftir aðgerðina og hann virtist í ágætu standi á æfingunni í dag. Það lofar góðu fyrir helgina."

Jonjo Shelvey er einnig byrjaður að æfa eftir meiðsli, en hinsvegar hefur komið bakslag í bata Martin Kelly og Fabio Aurelio og ekki ljóst hvenær þeir verða klárir í slaginn.