Gleðidagur í Liverpool!

Steven Gerrard ætlar að leiða Liverpool áfram og allir í Liverpool gleðjast segir Roy Hodgson! Hann segir það frábær tíðindi að Steven ætli sér að vera áfram í Liverpool og víst munu allir Rauðliðar í Liverpool taka undir það. Við höfum engar áhyggjur af því hvað Bláliðum finnst. 

"Þetta eru frábærar fréttir og í dag gleðjast allir í Liverpool. Ég er auðvitað mjög ánægður með þetta því ég ber mikla virðingu fyrir Steven Gerrard. Þegar ég kom til Liverpool þá var hann einn þeirra leikmanna sem ég hlakkaði mikið til að vinna með. Nú lítur allt út fyrir að hann verði hérna áfram og ég fái tækifæri til að vinna með honum."

"Þetta verður erfitt keppnistímabil og við þurfum að spila marga leiki. Vonbrigði síðasta keppnistímabils eiga eftir að sitja í mönnum en það er mjög gott að bestu menn okkar ætli að vera um kyrrt og spila fyrir hönd félagsins."

"Það verður svo vonandi meiri samkeppni um stöður í liðinu þar sem við erum búnir að fá Joe Cole og vonandi lánast okkur að bæta einum eða tveimur leikmönnum í hópinn til viðbótar. Liðshópurinn verður því sterkari en á síðasta keppnistímabili þegar nýtt hefst. Hópurinn verður að minnsta kosti sterkari á pappírnum."