Forsíða

Frétt

19.07.2010 00:07 | Sf. Gutt

Lagt í hann með ungt lið


Roy Hodgson, framkvæmdastjóri Liverpool, telur að hann muni hefja leiktíðina án sterkustu manna liðsins sem eru enn að hvíla sig eftir átökin í Heimsmeistarakeppninni. Alls er heilt byrjunarlið Liverpool ekki komið til æfinga og því er Roy sem sagt ennþá án ellefu leikmanna nú þegar undirbúningur fyrir komandi leiktíð er farinn í gang!

Miðað við þetta gætu ungir og óreyndir menn skipað mörg sæti í byrjunarliðinu þegar Liverpool hefur leik í Evrópudeildinni gegn Rabotnicki eða Mika. Roy segir að læknalið félagsins hafi ráðlagt honum að það væri mjög áhættusamt að drífa þá leikmenn, sem tóku þátt í HM, í alvöruleiki of fljótt eftir að þeir hefja æfingar. Slíkt gæti leitt til meiðsla og ekki væri það gott.

Af þeim leikmönnum sem léku í Suður Afríku eru aðeins þeir Sotirios Kyrgiakos og Milan Jovanovic komnir til æfinga og þeir gætu spilað þessa tvo fyrstu Evrópuleiki. Fjárfesti Liverpool í leikmönnum fyrir þessa fyrstu leiki gætu þeir auðvitað spilað í þessum leikjum svo framarlega að þeir hafi ekki líka verið að spila í Suður Afríku.  

Þetta þýðir að efnilegir en óreyndir leikmenn komi að öllum líkindum til að verja heiður Liverpool og koma liðinu yfir fyrstu hindrunina á Evrópuvegferðinni. Að sjálfsögðu er það gott að ungir leikmenn fái tækifæri en á móti kemur að eitthvað mun áhættan aukast á því að Liverpool komist ekki áfram.


Til baka

Fréttir

Samstarfsaðilar

  • Úrilla górillan
  • Jói Útherji knattspyrnuverslun
  • VITA
  • Advania
  • Ölgerðin