Skárri fréttir af Torres

Þrátt fyrir að hafa aðeins leikið síðastu fimmtán mínúturnar í framlengingu úrslitaleiks Heimsmeistaramótsins þá tókst framherjanum Fernando Torres að eiga þátt í sigurmarkinu og meiðast rétt fyrir leikslok.

Útlitið var ekki bjart til að byrja með en talið var að hann gæti verið frá vegna meiðsla í allt að tvo mánuði. Leikmaðurinn fór í gær í röntgenmyndatöku sem sýndi að meiðslin eru ekki eins slæm og í fyrstu var haldið.

"Í upphafi leit út fyrir að hann hefði rifnað smávægilega í lærinu og læknalið spænska liðsins töldu það ekki vera alvarlegt á þeim tíma. Í gær fór hann í röntgenmyndatöku sem staðfesti smá rifu í vöðvanum. Hann ætti að geta hafið æfingar á næstu tveimur til þremur vikum og geta spilað eftir þrjár til fjórar." sagði Peter Brukner, yfirmaður læknamála hjá Liverpool.

Það eru því góðar fréttir að Torres muni aðeins vera frá í tæplega fjórar vikur frekar en þær átta sem í upphafi var talið. Hann gæti því verið klár fyrir upphafsleiki Liverpool í Úrvalsdeildinni og ekki veitir af honum þar sem fyrstu tveir leikirnir eru gegn Arsenal og Manchester City.