Jovanovic fær tíuna

Liverpool hefur greint frá því að treyja númer tíu verði í notkun á næstu leiktíð en nýjasta viðbótin í leikmannahóp Liverpool, Milan Jovanovic, fær að klæðast þessari merku treyju.

Sá síðasti sem spilaði undir þessu númeri var Andriy Voronin sem kom á frjálsri sölu til Liverpool líkt og Jovanovic. Aðrir sem hafa borið þetta eftirsótta framherja númer hjá Liverpool eru meðal annars John Barnes, Luis Garcia, Terry McDermott, Jan Molby, Michael Owen og John Toshack.

Nú er það ljóst að fyllt hefur verið upp í tíuna en þá verður athyglisvert að sjá hvort einhver leikmaður Liverpool muni leika í treyju númer sjö á næstu leiktíð. Sá síðasti sem klæddi hana var Robbie Keane en hann átti ekki sjö dagana sæla hjá Liverpool.