Torres frá í 8 vikur?

Sky Sport News segja frá því í dag að nárameiðsl Fernando Torres hafi tekið sig upp í úrslitaleiknum í gær og svo gæti farið að hann yrði lengi frá.

Það er blaðamaðurinn Guillem Balague sem er heimildamaður Sky Sport News og hann segir að það hafi verið áhætta að láta Fernando spila í gær þar sem hann hafi augljóslega ekki verið búinn að jafna sig að fullu af meiðslunum. Hann hafi hins vegar eðlilega verið áfjáður í að taka þátt í leiknum og því hafi Del Bosque ákveðið að tefla honum fram.

Balague bætir því reyndar við að ástand Torres verði ekki staðfest fyrr en eftir nánari læknisskoðun.

Daily Mirror fullyrðir hinsvegar að Torres verði frá í 8 vikur. Það hefur hvergi verið staðfest og við vonum að sjálfsögðu að slúðrararnir þar á bæ hafi ekki rétt fyrir sér að þessu sinni.