Allir með hreint borð!

Það er kominn nýr maður í brúna á Anfiel og búast má við að einhverjir núverandi leikmenn Liverpool fari og aðrir komi í staðinn. Allir, sem skipa aðalliðshópinn þegar ný leiktíð hefst verða með hreint borð segir Roy Hodgson nýráðinn framkvæmdastjóri Liverpool. Roy segir að það væri heimska að gefa ekki öllum tækifæri til að spreyta sig og hann beindi orðum sínum ekki síst til ungliða Liverpool. 

Mörgum stuðningsmönnum Liverpol fannst að tveir síðustu framkvæmdastjórar liðsins hefðu ekki verið nærri nógu duglegir að leyfa ungum leikmönnum að spreyta sig. Leikmenn á borð við Martin Kelly, Jay Spearing og Stephen Darby spiluðu ekki mikið á síðustu leiktíð en álit margra var að þeir hefðu vel getað skilað álíka góðu og jafnvel betra verki og ýmsir meðalmenn sem voru fengnir frá öðrum liðum. Jay og Stephen fengu góða reynslu á lánstíma sínum á lokakafla síðustu leiktíðar. Fleiri unga leikmenn mætti nefna sem væntanlega sjá nú möguleika á að fá tækifæri.

 

Þessi orð Roy Hodgson má líka túlka á jákvæðan hátt fyrir suma aðalliðsmenn sem ekki spiluðu mikið á síðustu leiktíð eins og Albert Riera sem var settur út í kuldann af Rafael Benítez eftir all harða gagnrýni sína á framkvæmdastjórann og liðið sitt. Nú er kannski ekki víst að hann verði seldur eins og allt útlit var á.

Svo er að sjá hvaða menn verða í aðalliðshópnum þegar keppnistímabilið hefst núna í lok þessa mánaðar. Fyrst og síðast skiptir þó öllu að allir í hópnum séu ákveðnir í að spila og standa sig fyrir Liverpool!