Langt keppnistímabil framundan!

Komandi keppnistímabil verður langt og strangt hjá leikmönnum Liverpool sem hófu æfingar í gær. Liðið hefur keppni í lok þessa mánuðar þegar 3. umferð í forkeppni Evrópudeildarinnar fer af stað fimmtudaginn 29. júlí með fyrri leikjum. Seinni leikir 3. umferðar fara fram fimmtudaginn 5. ágúst. Liverpool á sem sagt fyrsta leik 29. júli og deildarkeppninni lýkur ekki fyrr en 22. maí næsta vor! 

Komist Liverpool í gegnum 3. umferðina fer liðið í umspil um sæti í riðlakeppninni. Þeir leikir fara fram 19. og 26. ágúst. Sigurvegarar hverrar rimmu fara í riðlakeppnina. Það kemur í ljós föstudaginn 16. júlí hvaða liði Liverpool mætir í 3. umferð forkeppni Evrópudeildarinnar en þá verður dregið til hennar. Fyrsti æfingaleikur Liverpool fer fram daginn áður en þá mætir liðið Sádi-Arabísku meisturunum Al Hilal í Austurríki.
 
Liverpool þyrfti ekki að hefja keppni svona snemma nema vegna þess að liðið lenti í sjöunda sæti í deildinni. Hefði liðið komist einu sæti ofar hefði það ekki þurft að hefja leik fyrr en í umspilinu seinni partinn í ágúst og hefði munað um minna. Skot Steven Gerrard, gegn Hull City í lokaumferðinni, hefði betur farið í stöng og inn en ekki í stöng og út. Svona er oft stutt á milli!