Óvissa um undanúrslitin

Gosið í Eyjafjallajökli gæti komið í veg fyrir að fyrri leikirnir í undanúrslitum í Evrópudeildinni geti farið fram á fimmtudagskvöldið. Forráðamenn Knattspyrnusambands Evrópu eru nú að íhuga hvað hægt sé að gera í stöðunni. 

Flug yfir stóran hluta Evrópu hefur að mestu legið niðri síðustu daga og óvissa er um aðstæður til flugs næstu dagana. Fernando Torres varð til dæmis að fara með járnbrautarlest til Spánar í gær til að komast til sérfræðingsins sem tók ákvörðun um að senda hann í aðgerð. 

Liverpool leikur auðvitað við West Ham United í kvöld en liðið þarf að fljúga til Madrídar til leiksins þar. Það sama gildir um leik Fulham í Hamborg. Það er sem sagt hugsanlegt að báðum leikjunum verði frestað. Fyrri undanúrslitaleikirnir í Meistaradeildinni fara fram núna í vikunni en tiltölulega stutt er fyrir þau lið sem þar eiga í hlut að komast á leikstað.