Fernando spilar ekki meir á keppnistímabilinu!

Fernando Torres mun ekki spila meira með Liverpool á þessu keppnistímabili. Talsmaður Liverpool lét hafa þetta eftir sér á Liverpoolfc.tv núna síðdegis.

,,Fernando hitti sérfræðing á Spáni fyrr í dag. Sú ákvörðun var tekin að hann þyrfti að fara í aðgerð til að laga rifin liðþófa í hægra hnéi hans. Aðgerðin fer fram seinna í kvöld."
 
,,Það er ekki hægt að segja til um, áður en aðgerðin fer fram, hversu lengi hann verður frá en venjan er að endurhæfing í kjölfar svona aðgerðar taki um það bil sex vikur."
 
Það þarf ekki að fara mörgum orðum um það hversu mikið áfall þetta er fyrir Liverpool núna þegar dregur að lokum þessa erfiða keppnistímabilis. Liðið á enn svolitla möguleika á að ná fjórða sæti deildarinnar og svo er framundan rimma við Atletico Madrid í undanúrslitum Evrópudeildarinnar. Fernando Torres er markahæstur leikmanna Liverpool á sparktíðinni með 22 mörk.