Martin Kelly úr leik

Ólánið hefur elt hinn efnilega Martin Kelly og hann er nú að öllum líkindum kominn í sumarfrí eftir að hafa orðið fyrir meiðslum á hné. Það sem gerir ólánið meira er að Martin meiddist á æfingu. Meiðslin eru svipuð þeim sem Fernando Torres varð fyrir í byrjun ársins. Sem fyrr segir þá er ólíklegt að Martin spili meira á þessu keppnistímabili eftir því sem greint er frá í staðarblaðinu Echo. 

Þetta er í annað sinn á keppnistímabilinu sem Martin meiðist illa. Hann meiddist illa á ökkla í lok október gegn Lyon í Meistaradeildinni og gat ekki spilað aftur fyrr en núna eftir áramót. Þau meiðsli komu á versta tíma því Martin hefði örugglega spilað töluvert á þeim tíma sem hann var frá því Glen Johnson var meiddur hluta þess tíma.
 
Martin Kelly er geysilega efnilegur varnarmaður og er talinn einn sá ungliði Liverpool sem líklegastur er talinn til að komast í aðallið Liverpool á næstu árum. Hann hefur hingað til leikið fjóra leiki með aðalliði Liverpool. Hann lék um tíma sem lánsmaður hjá Hudderfield á síðasta keppnistímabili og stóð sig með sóma þar.