Þrír leikmenn setja Benítez í vandræði

Rafa Benítez viðurkennir að þrír leikmenn hafi sett sig í mikil vandræði varðandi liðsval fyrir næstu leiki liðsins.  Benítez var hæstánægður með þá Maxi Rodriguez, Ryan Babel og Alberto Aquilani eftir frammistöðu þeirra gegn Portsmouth á mánudaginn.

Næsti leikur er á fimmtudagskvöldið gegn Lille og þar mun Maxi ekki spila því hann má ekki leika með liðinu í Evrópukeppninni.  Næsti leikur er svo á sunnudaginn gegn Manchester United og nú á Benítez marga möguleika varðandi liðsvalið en oft á þessu tímabili hefur hann verið í tómu basli með að stilla up sterku liði vegna meiðsla.

,,Ég er mjög ánægður með Maxi og Ryan," sagði Benítez.  ,,Þeir voru mjög góðir í því að halda boltanum og Ryan var duglegur að keyra á varnarmennina.  Ég er ánægður með skilninginn á milli leikmanna.  Við spiluðum með Maxi, Ryan og Aquilani því við vildum sækja fram.  Við vissum að það var mikilvægt að vinna og skora nokkur mörk og við reyndum að gera þetta frá byrjun leiks."

,,Aðalatriðið er að nú stöndum við frammi fyrir vandamáli með leikmenn sem koma inn og spila vel.  Það er gott vandamál að eiga við."

Aquilani var maður leiksins gegn Portsmouth og hann spilaði í fyrsta sinn í 90 mínútur í deildinni.  Ítalinn skoraði mark og átti stoðsendingu á Torres í síðasta marki leiksins.  Benítez segir þó að hann muni taka marga hluti til greina þegar hann ákveður hver mun byrja á miðjunni gegn Lille."

,,Á miðjunni gegn Portsmouth vorum við með Mascherano og Alberto sem stjórnuðu leiknum.  Það var mjög gott.  Alberto þarf samt ennþá að bæta leikform sitt.  Hann spilaði í 90 mínútur og hann nýtti tækifærið vel.  Við sjáum til núna.  Það eru margir leikir framundan á stuttum tíma og því er mikilvægt að við séum með alla leikmenn tiltæka."

,,Hann getur spilað leiki eins og Mascherano, Lucas og Gerrard.  Þetta veltur allt á leikmanninum sjálfum og andstæðingunum.  Maður þarf að greina alla þessa hluti.  Það sem við stjórarnir höfum fram yfir aðra er að við sjáum leikmennina á æfingum alla daga, það er lykilatriðið."