Johnson gæti verið með á mánudag

Rafa Benítez skýrði frá því á blaðamannafundi fyrr í dag að hann muni ákveða á mánudaginn hvort hann hafi Glen Johnson í leikmannahópnum fyrir leikinn gegn Wigan.  Johnson hefur verið frá síðan 29. desember en þá meiddist hann á hné í leik gegn Aston Villa.

Johnson hefur nú hafið æfingar að fullu eftir meiðslin og Benítez mun ákveða seint á mánudaginn hvort hann noti Johnson eða ekki.

,,Við eigum ekki við mikil meiðslavandræði að stríða núna," sagði Benítez á blaðamannafundi.  ,,Skrtel og Aurelio eru meiddir eins og áður hefur komið fram.  Aðrir leikmenn eru að koma til baka í góðu standi eftir að hafa spilað með landsliðum sínum."

,,Johnson hefur verið að æfa að undanförnu, ég mun því þurfa að taka ákvörðun um hvort hann verði í leikmannahópnum eða ekki."

Verði Johnson ekki notaður gegn Wigan er allt eins líklegt að hann verði með í leiknum gegn Lille í Frakklandi fimmtudaginn 11. mars.

Endurkoma Johnson í vörnina þýðir að Jamie Carragher mun þá fara yfir í miðvörðinn enda veitir ekki af því þar sem Martin Skrtel verður lengi frá.