| Sf. Gutt

Skemmtileg kvöldstund

Daniel Pacheco átti stóran þátt í sigri Liverpool í Evrópudeildarsigri liðsins á Unirea í gærkvöldi. Hann lagði upp eina mark leiksins fyrir David Ngog. Daniel fannst þetta góð kvöldstund á Anfield.

"Það var mjög mikilvægt að vinna leikinn og kvöldið var enn skemmtilegra fyrir þær sakir að ég skyldi eiga þátt í sigurmarkinu. Fyrirgjöfin frá Ryan var frábær og ég náði að skalla boltann til baka á David sem skoraði. Allir voru mjög ánægðir þegar upp var staðið."

Daniel er geysilega efnilegur leikmaður og miklar vonir eru bundnar við hann hjá Liverpool. Hann sýndi að hann kann ýmislegt fyrir sér þegar hann kom inn á gegn Unirea. Stuðningsmenn Liverpool tóku honum vel og kyrjuðu nafnið hans.

"Það er alveg magnað að heyra áhorfendur syngja nafnið þitt. Þetta var skemmtileg stund fyrir fjölskylduna mína en mikilvægast var að liðið vann og við náðum góðum úrslitum."

Þetta var í þriðja sinn sem Daniel Pacheco spilar með Liverpool. Hann fær vonandi fleiri tækifæri í næstu leikjum því það virðist vera að hann sé nú tilbúinn í slaginn með aðalliðinu. Það veitir heldur ekki af að fríska upp á sóknarleik Liverpool ef hægt er.








TIL BAKA
Nýlegar fréttir
Fleiri fréttir
Fréttageymslan