Draumabyrjun hjá Kristjáni Gauta!

Ferill Kristjáns Gauta Emilssonar hjá Liverpool hefði ekki getað byrjað betur. Hann lék sinn fyrsta leik í dag og skoraði sigurmark gegn Manchester United!

Kristján kom inn á sem varamaður í undir 18 ára liði Liverpool sem mætti Manchester United á útivelli í unglingadeildinni. Kristján Gauti kom til leiks á 60. mínútu. Ekkert mark hefði þá verið skorað í leiknum en það breyttist þegar fimm mínútur voru eftir. Tom Ince sendi þá góða sendingu fyrir frá hægri beint á höfuðið á Kristjáni sem skallaði í mark úr teignum. Skallinn var vel framkvæmdur hjá Kristjáni og boltinn steinlá í markinu. Markið tryggði sigur Liverpool og það er varla hægt að byrja feril sinn betur sem leikmaður Liverpool en með að skora sigurmark gegn Manchester United nema þá gegn Everton! 

Liverpool: Oldfield, Flanagan, Wisdom, Sama, Robinson, Roberts, Coady, Ince, Ngoo, Adorjan ( Emilsson 60. mín.) og Dalla Valle. Ónotaðir varamenn: Chamberlain, Ellison, Roddan og Ihiekwe.
 
Kristján Gauti Emilsson gekk til liðs við Liverpool frá F.H. í síðasta mánuði en þetta var fyrsti leikur hans með Liverpool. Undir 18 ára liði Liverpool hefur gengið misjafnlega á þessu keppnistímabili en liðið er enn með í Unglingabikarkeppninni og ekki er ólíklegt að Kristján fái tækifæri í þeirri keppni.