Lengi getur vont versnað!

Lengi getur vont versnað. Það var ekki nóg með að leikur Liverpool í gærkvöldi hefði verið til skammar. Þrír markahæstu menn liðsins eru nú úr leik eftir að hafa meiðst í þessum hörmungarleik. 

Fernando Torres meiddist á hné og nú er ljóst að hann þarf í aðgerð til að laga meiðslin. Hann verður frá í sex vikur eða svo. 

Steven Gerrard tognaði aftan í læri og reiknað er með að hann verði úr leik í hálfan mánuð hið minnsta. 

Yossi Benayoun verður frá í upp undir mánuð. Hann brákaði rifbein í leiknum. 

Þessir þrír leikmenn hafa skorað flest mörk Liverpool hingað til á keppnistímabilinu en það er deginum ljósara að þeir munu ekki bæta við mörkum næstu vikurnar!