Kemur Maxi Rodriguez til Liverpool?

Argentínumaðurinn Maxi Rodriguez er sagður þessa dagana í viðræðum við forráðamenn Liverpool. Hann leikur núna með Atletico Madrid og gæti komið sem lánsmaður ef eitthvað í hæft í þessum fréttum.

Rafael Benítez er sagður hafa hug á að fá argentínska kantmanninn að láni til vors ef samkomulag næðist við spænska liðið. Maxi hefur ekki átt fast sæti í liði Atletico á þessu keppnistímabili og hafa fregnir um hugsanlega komu hans til Liverpool verið mikið í fjölmiðlum síðustu daga.

Það er ekki venjan að fjalla mikið um svona sögusagnir á Liverpool.is en í dag var sagt af viðræðum Liverpool og Atletico Madrid í staðarblaðinu Echo og því er væntanlega eitthvað í gangi. Fréttir dagsins hermdu að Maxi væri tilbúinn að lækka laun sín til að greiða fyrir því að komast til Liverpool.   

Komi Maxi til Liverpool þá hefur hann það í reynslubankanum að skora á Anfield. Hann skoraði mark Altetico á síðustu leiktíð þegar liðin gerðu 1:1 jafntefli í riðlakeppni Meistaradeildarinnar.