Forsíða

Frétt

02.11.2009 19:11 | Sf. Gutt

Blendnar tilfinningar

Það voru blendnar tilfinngar í huga hins unga Martin Kelly eftir frumraun hans á Anfield Road gegn Lyon á dögunum. Hann stóð sig með sóma og hefðu margir félaga hans mátt taka hann sér til fyrirmyndar. Hann var á hinn bóginn í tapliði, meiddist í leiknum og hefur verið frá vegna þeirra meiðsla síðan.

"Ég var mjög ánægður með frumraun mína og stuðningsmennirnir tóku mér frábærlega en úrslitin voru auðvitað vonbrigði. Mér fannst við verðskulda að vinna og þetta var gremjulegt kvöld."
 
Það var aðeins klukkutími í leik þegar Martin fékk að vita að hann ætti að spila en hann greip svo sannarlega tækifærið og lék mjög vel sem hægri bakvörður. 

"Það að vera í fyrsta sinn í byrjunarliði Liverpool á eftir að gefa mér mikið sjálfstraust. Það eitt gefur þó lítið og í knattspyrnunni gildir að maður er bara metinn eftir því hvernig maður stóð sig í síðasta leik. Ég verð núna að halda áfram að leggja hart að mér og reyna að spila vel í hverri einustu viku. Einn góður leikur gefur lítið í aðra hönd."

Sem fyrr segir þá lék Martin mjög vel gegn Lyon. Hann varð þó fyrir meiðslum í leiknum þegar hann reyndi að koma í veg fyrir jöfnunarmark franska liðsins. Meiðslin voru dýrkeypt því næsta víst er að Martin væri búinn að leika einn ef ekki tvo leiki með Liverpool hefði hann ekki meiðst. 

Martin Kelly er mjög efnilegur og margir telja að hann eigi góða möguleika á að komast í aðallið Liverpool. Miðað við framgöngu hans gegn Lyon þá gæti hann verið sá af ungliðum Liverpool sem gæti náð hvað lengst á næstu árum.





Til baka

Fréttir

Samstarfsaðilar

  • Úrilla górillan
  • Jói Útherji knattspyrnuverslun
  • VITA
  • Advania
  • Ölgerðin