Samkomulag í höfn við Real Madrid

Liverpool FC gaf út fréttatilkynningu í kvöld þar sem þeir tilkynna að náðst hafi samkomulag við Real Madrid vegna kaupa þeirra síðarnefndu á Xabi Alonso. Þar með ætti sápuóperu sumarsins að ljúka.

Talið er að kaupverðið sé í kringum 30 milljónir punda. En það verður líklegast ekki staðfest opinberlega þar sem félögin hafi sagt að það sé trúnaðamál.

Xabi Alonso mun fljúga til Madrid á morgun í læknisskoðun og fjögurra ára samningur milli hans og Real Madrid liggur klár á borðinu til undirskriftar.

Þetta er lang hæsta upphæð sem fengist hefur fyrir leikmann Liverpool FC og er næstum því tvöfalt hærri heldur en gamla metið sem var salan á Robbie Keane til Tottenham í vetur.

Alonso var keyptur til liðsins fyrir fimm árum síðan fyrir 10.7 milljónir punda.

Við hér á liverpool.is þökkum Xabi Alonso kærlega fyrir hans framlag síðustu árin og þá sérstaklega fyrir Istanbul ævintýrið yndislega.

Þar með eru einungis Steven Gerrard & Jamie Carragher eftir af þeim leikmönnum sem tóku þátt í leikjum Liverpool leiktímabilið 2004-2005. Allir aðrir eru horfnir á braut.