Forsíða

Frétt

29.06.2009 08:06 | Sf. Gutt

John Barnes ráðinn til Tranmere Rovers

John Barnes var á dögunum ráðinn framkvæmdastjóri Tranmere Rovers. Hann hefur lengi haft áhuga á að stýra ensku félagsliði og nú hefur honum loks gefist kostur á því.

John var ráðinn stjóri Celtic sumarið 1999 en honum var vikið úr starfi þar í febrúar árið eftir. John hefur ekkert fengist við þjálfun síðan utan hvað hann stýrði landsliði Jamaíka frá því seint á síðasta ári og þangað til núna í sumar. Hann fékk sig lausan undan samningi frá landsliðinu þegar hann fékk tilboðið frá Tranmere.   

Helsti aðstoðarmaður John Barnes verður Jason McAteer sem lék á sínum tíma með John hjá Liverpool. Jason lék sjálfur í þrjú ár með Tranmere og lauk keppnisferli sínum þar. 

John Barnes lék 407 leiki með Liverpool og skoraði 108 mörk á árunum 1987 til 1997. Jason McAteer spilaði 139 leiki með Liverpool og skoraði sex sinnum. 

Eins og alllir stuðningsmenn Liverpool ættu að vita þá er Tranmere Rovers staðsett í Liverpool. Félagið er hinu megin við ána Mersey í borgarhluta sem heitir Birkenhead. John hefur búið þeim megin árinnar þannig að það verður stutt í vinnuna hjá honum.  
Til baka

Fréttir

Samstarfsaðilar

  • Úrilla górillan
  • Jói Útherji knattspyrnuverslun
  • VITA
  • Advania
  • Ölgerðin