Úrslitarimman hefst í kvöld

Úrslitarimma Liverpool og Arsenal um Unglingabikarinn hefst í kvöld þegar liðin leiða saman hesta sína á Emirates leikvanginum í London. Liðin mætast svo í annað sinn á Anfield Road á þriðjudagskvöldið. Samanlögð markatala eða vítaspyrnukeppni, verði liðin jöfn að mörkum, ræður úrslitum.

Bæði lið komust í úrslitin á sannfærandi hátt. Liverpool vann samanlagðan sigur 6:1 á Birmingham City í undanúrslitum og Arsenal lagði Manchester City 6:2. Það má því búast við mikilli rimmu og mörgum mörkum ef marka má undanúrslitin.

Liverpool er með alla sína bestu menn klára nema hvað Adam Pepper er meiddur. Leikurinn í kvöld hefst klukkan sjö að íslenskum tíma og er honum sjónvarpað á erlendum stöðvum.