Lucas ætlar að vinna stuðningsmennina á sitt band

Brasilíumaðurinn Lucas Leiva lék einn besta leik sinn á tímabilinu í sigri Liverpool á Manchester United um síðustu helgi. Hann leysti Xabi Alonso af hólmi og stóð hann vaktina vel í leiknum.

"Ég tel að ég sé að bæta mig og ég hef meira sjálfstraust á hverjum degi. Liðið er að spila vel, það hjálpar einnig til. Það eru líka allir leikmennirnir sjóðandi heitir, og allir þessir hlutir hjálpa mér mikið.

Ég veit að það er fólk sem treystir mér ekki enn en ég mun reyna að sýna þeim þau gæði sem ég hef og ég held að ég sé byrjaður að gera það.

Þegar þú leikur tvo leiki í röð þá færðu meira sjálfstraust, þú nærð taktinum. Það er erfiðara ef þú spilar bara einn eða tvo leiki á mánuði, en ég hef unnið hörðum höndum við að bæta mig daglega og komast í mitt besta form." sagði hinn 22 ára gamli Brasilíumaður.

Eins og áður segir leysti hann stöðu Xabi Alonso í leiknum gegn Manchester United og því lék hann við hlið Javier Mascherano. Hann segir að báðir leikmennirnir hafi hjálpað honum mikið á góðum og erfiðum tímum.

"Þeir hjálpa mér mikið. Javier er herbergisfélagi minn svo við erum alltaf að tala saman. Hann og Xabi Alonso hafa báðir mikla reynslu og hafa þeir nú þegar unnið fullt af titlum. Ég reyni að bæta mig með þeim, og líka með Stevie - hann hjálpar mér mikið. Þeir segja mér að spila með sjálfsöryggi og að ég búi yfir miklum gæðum."
 
Lucas telur að tekið hafi verið eftir úrslitum leiksins út um allan heim - þar á meðal í heimalandi hans, Brasilíu.

"Allir í Brasilíu vita hve stórir þessi leikir eru og ég veit fyrir víst að fjölskylda mín mun vera stolt."

Eftir leikinn minnkaði Liverpool forskot Manchester United niður í fjögur stig, en United á þó einn leik til góða. Lucas segir hins vegar að hann og allir liðsfélagar hans trúi því að þeir geti hampað titlinum í vor.

"Andrúmsloftið er gott í augnablikinu vegna þess að við lögðum United að velli tvisvar og Chelsea einnig tvisvar. Nú erum við enn í baráttunni. Við vitum að það er erfitt en það er ekki ómögulegt, svo við verðum að halda áfram.

Það er núna fjögurra stiga bil á milli. Við verðum að vinna okkar leiki en það verða þeir líka að gera. Þessi úrslit og leikurinn gegn Real Madrid hefur gefið okkur mikið sjálfstraust."