Rafael van der Vaart er kokhraustur

Rafael van der Vaart, leikmaður Real Madrid, segist halda að leikmenn Liverpool óttist mjög að mæta á Bernabeu í næstu viku, en þá fer fram fyrri viðureign þessara fornfrægu félaga í útsláttarkeppni Meistaradeildarinnar.

Bæði félögin eiga að baki glæsta sögu í Evrópukeppni meistaraliða, Real Madrid hefur hampað Evrópubikarnum 9 sinnum og Liverpool 5 sinnum.

En þrátt fyrir að Liverpool hafi átt mikilli velgengni að fagna í Evrópuboltanum er van der Vaart þess fullviss að leikmenn liðsins verði skjálfandi á beinunum í næstu viku.

,,Við erum einfaldlega Real Madrid, þessvegna held ég að leikmenn Liverpool muni hræðast okkur", segir Hollendingurinn kokhraustur.

,,Við höfum á að skipa frábæru liði og ég er viss um að þetta verður frábær leikur. Við leggjum allt kapp á að standa okkur vel í Evrópu og ég mun gera allt sem í mínu valdi stendur til þess að við förum alla leið í keppninni."

Vonandi verður upplitið á Hollendingnum ekki svona djarft þegar þessari rimmu er lokið!