Arbeloa líklega ekki með gegn Stoke

Alvaro Arbeloa hefur verið að glíma við meiðsli í lærvöðva mun líklega ekki verða orðinn klár fyrir leikinn við Stoke á laugardaginn.  Arbeloa hefur misst af síðustu þremur leikjum liðsins eftir að hann meiddist í upphitun fyrir leikinn við Bolton annan jóladag.

Jamie Carragher hefur spilað í hægri bakverði í þessum leikjum og leyst þá stöðu ágætlega af hólmi, það er því ljóst að Carra verður í hægri bakvarðastöðunni þegar flautað verður til leiks á laugardaginn.

Arbeloa hlakkar mikið til þess að geta farið að spila aftur og er hann ekki í vafa um að Liverpool hafi það sem til þarf til að ná stærsta bikarnum sem í boði er þetta tímabilið.  Hann segir þó að þrátt fyrir þriggja stiga forystu liðsins á toppnum eigi leikmennirnir nóg eftir til þess að klára tímabilið.

,,Við höfum allt sem til þarf til að vinna bikara," sagði hann.  ,,Góðan stjóra, frábæra stuðningsmenn og trú á okkur sjálfa.  Við höfum sannað það með því að koma til baka í mörgum leikjum á tímabilinu.  Allir eru tilbúnir til að berjast fyrir hvorn annan."

,,Við erum með mjög gott lið og ég held að við höfum ekki sýnt okkar besta form ennþá á tímabilinu.  Við erum að spila vel en erum ekki á nema kannski 80% af því sem við eigum að geta.  Fljótlega munum við þó komast í hæsta gír."