Njótum toppsætisins

Sami Hyypia hefur reynt margt á löngum ferli sínum. Þessi reyndasti leikmaður Liverpool er ekki lengur fastamaður í liðinu en hefur leikið tvo síðustu leiki og staðið sig með sóma í vörninni. Hann nýtur þess að vera í efsta sæti deildarinnar og hann vill að liðsfélagar sínir geri það líka.

"Ég get ekki séð að það sé eitthvað aukalegt álag því fylgjandi að vera í efsta sæti deildarinnar núna. Við erum búnir að standa okkur vel og komast í efsta sætið og núna verðum við bara að gera okkar besta til að halda sætinu. Við getum ekki annað en reynt að vinna hvern einasta leik og sjá svo til. Það þýðir ekkert að horfa of langt fram í tímann og setja óþarfa pressu á okkur með því. Við eigum að vera ánægðir með að vera á toppnum og njóta þess að vera þar."