Það hefur allt gengið á afturfótunum hjá Svisslendingnum Philipp Degen eftir að hann kom til Liverpool. Hann er nú meiddur í þriðja sinn og verður frá leik í rúman mánuð.
Hann meiddist á fæti undir lok Deildarbikarleiks Liverpool og Tottenham Hotspur í síðustu viku.
Philipp meiddist á nára í æfingaleik áður en leiktíðin hófst. Hann kom svo til leiks eftir þau meiðsli gegn Crewe í Deildarbikarnum en síðubrotnaði í þeim leik.
Svisslendingurinn var svo nýlega orðinn góður af þeim meiðslum þegar hann meiddist gegn Tottenham. Ekki bættu meiðslin úr skák því Philipp hafði spilað illa í leiknum. Eftir leikinn kom í ljós að hann er ristarbrotinn. Það er því kannski ekki skrýtið þótt Phillipp sé niðurbrotinn.
"Þetta er það versta sem hefur nokkurn tíma komið fyrir mig. Ég brast í grát í búningsklefanum eftir leikinn. Gareth Bale, leikmaður Tottenham, braut illa á mér en ég fékk ekki einu sinni vítaspyrnu. Það er brotið bein í fætinum og ég get ekki spilað í fjórar til sex vikur. Ég spyr mig sjálfan mig látlaust hvort ég hafi gert eitthvað rangt í fyrra lífi."
Þess má geta að Gareth Bale braut á Philipp innan vítateigs þegar um átta mínútur voru til leiksloka. Staðan var þá 4:2 fyrir Tottenham og vítaspyrna hefði getað gefið Liverpool möguleika á að jafna. Dómarinn dæmdi þó ekkert en Rafael Benítez benti á, eftir leik, að ristarbrot Svisslendingsins væri örugg sönnun þess að Liverpool hefði átt að fá vítaspyrnu!