Titilvörnin hófst vel

Varaliðsmeistararnir hófu titilvörnina vel með góðum útisigri í kvöld. Liverpool lagði Middlesborough að velli 1:0 á Riverside í hellirigningu.

Leikurinn hófst rólega en það voru Englandsmeistararnir sem náðu fyrr áttum og hófu að herja á heimamenn. Það var bjargað á línu frá Jordy Brouwer, sem er hér á mynd, og svo komst Liverpool yfir á 17. mínútu. Daniel Pacheco sendi þá fyrir frá hægri á Jordy sem skallaði að marki. Boltinn fór í þverslá en Hollendingurinn fylgdi vel á eftir og skoraði. Rétt á eftir átti Daniel skot í stöng og Liverpool hafði öll völd til leikshlés.

Svissneski landsliðsmaðurinn Philipp Degen sneri aftur til leiks eftir meiðsli þegar hann kom inn sem varamaður í hálfleik. Heimamenn hresstust í síðari hálfleik og Ungverjinn Peter Gulacsi fékk loks eitthvað að gera í markinu. Hann gerði, eins og fram hefur komið, samning við Liverpool í vikunni eftir að hafa verið á láni. Peter varði tvívegis vel. Ungverjinn Andras Simon, sem kom inn á sem varamaður, hefði átt að gera út um leikinn á 70. mínútu. Markamaður Boro Jason Steele átti þá misheppnað útspark sem fór beint á Andras en hann náði að bæta fyrir mistökin og verja. Meistararnir héldu sínu og hófu vörnina á deildartitlinum eins og best var á kosið.

Hollendingurinn Vincent Weijl lék sinn fyrsta leik með varaliðinu.

Liverpool: Gulacsi, Ayala (Degen 46. mín.), Darby, San Jose, Huth, Kelly, Bruna, Spearing, Brouwer (Simon 61. mín.), Pacheco og Weijl (Irwin 85. mín.). Ónotaðir varamenn: Bouzanis og Crowther.

Maður leiksins samkvæmt Liverpoolfc.tv: Daniel Pacheco. Spánverjinn sýndi sköpunargáfu sínu vel með því að vera maðurinn á bak við bestu sóknir Liverpool.

Helsta heimild: Liverpoolfc.tv.