Lucas og félagar ætla að brjóta blað

Lucas Leiva og félagar hans í brasilíska landsliðinu ætla sér að brjóta blað með því að vinna Ólympíumeistaratitilinn í knattspyrnu. Brasilía mætir Ólympíumeisturum Argentínu og sæti í úrslitaleiknum er í húfi.

"Núna erum við aðeins einu skrefi frá því að komast í úrslitaleik um gullið. Þetta er gríðarlega mikilvægur leikur og ég hlakka virkilega til að eiga þátt í að brjóta blað í knattspyrnusögu þjóðar minnar. Ég vona svo að ég hafi staðið mig svo vel að ég geti fest mig í sessi í aðalliði landsliðsins þegar fram líða stundir."

Nú er bara að vona að þeir Lucas Leiva og Javier Mascherano slasi ekki hvorn annan í atgangnum í dag!

Hvað sem verður þá er að minnsta kosti ljóst að Liverpool á fulltrúa í úrslitaleiknum um gullið!