Benítez kaupir ungan varnarmann

Rafael Benítez hefur fengið til liðs við Liverpool ungan og bráðefnilegan spænskan varnarmann, Daniel Sanchez Ayala, frá Sevilla.

Ayala hafði hafnað tilboði Sevilla um atvinnumannasamning og þegar Liverpool frétti af þessu var brugðist skjótt við og samið við kappann. Liverpool mun borga Sevilla uppeldisbætur fyrir hann.

Ayala, sem er aðeins 17 ára gamall, er mjög mikils metinn hjá Sevilla. Þeir munu ekki vera par sáttir við að missa hann, en þetta er annar leikmaðurinn sem þeir missa til Liverpool á þennan hátt. Sá fyrri var Antonio Barragan árið 2005.

Samkvæmt fjölmiðlum bauð Liverpool Ayala þriggja ára samning og verður gengið frá honum endanlega í næstu viku.