Michael Owen

Tímabilið 2000-2001 hófst á því að Owen þurfti að sannfæra aðdáendur Liverpool að hann ætlaði sér að vera hjá Liverpool í náinni framtíð. Forseti Real Madrid lét þau ummæli falla að Owen væri sá leikmaður sem heillaði hann hvað mest og væri reiðubúinn að kaupa hann. Owen brást snöggt við: "Ég á þrjú ár eftir af samningi mínum og er hæstánægður hér hjá Liverpool. Ef vilji er fyrir hendi að hafa mig hér lengur en þessi þrjú ár þá myndi ég vera meira en reiðubúinn að ræða það. Ég er stoltur af að leika í treyju Liverpool og hef ekki hug á að fara héðan. Leikmennirnir sem við erum að kaupa bendir til þess að við erum á réttri leið." Hann var ennfremur vígreifur fyrir komandi keppnistímabil: "Ef ég meiðist ekki og ef ég er í aðalliðinu þá er ég fullviss um að ég skori 30 mörk á þessu tímabili. Í hvert skipti sem ég hef náð heilu keppnistímabili þá hef ég unnið gullskóinn. Ég skoraði 23 mörk mín fyrstu tvö keppnistímabil."

Owen skoraði sannkallað undramark gegn Benfica á undirbúningstímabilinu er hann klippti boltann glæsilega í loftinu í fjærhornið. Owen lét að sér kveða í deildinni í þriðja leik tímabilsins gegn Southampton 28. ágúst er hann skoraði tvö mörk. Houllier var stoltur af strák: "Hann lagði mikla vinnu að baki í leiknum og skoraði tvö mörk með vinstri sem er talinn veikari fóturinn hans. Hann var frábær."

þrenna gegn Villa

Glenn Hoddle framkvæmdastjóri Southampton var einnig heillaður af frammistöðu piltsins: "Það eru 7-8 mánuðir síðan ég sá hann svona sprækan. Hann hugsaði einungis um að skora í dag og virtist ekki hafa neinar áhyggjur af hugsanlegum meiðslum. Ég hef ekki hugmynd um hversu mikils virði hann er á markaðnum í dag."

Owen var ánægður með form sitt: "Ég hef trú á því að ég hafi yfirstigið meiðslin. Ég get fullyrt það út frá sprettæfingunum sem við gerum á æfingasvæðinu. Ég var aftarlega í röðinni þegar ég var enn að hlífa mér útaf hugsanlegum meiðslum en nú er ég aftur orðinn sá fljótasti hjá félaginu. Ég hef engar áhyggjur af meiðslum í dag." Hann skoraði mark Englendinga í vináttulandsleik gegn heims- og Evrópumeisturum Frakka og 6. september skoraði hann glæsilega þrennu gegn Aston Villa á Anfield. Þremur dögum síðar var komið að Manchester City og 54 deildarmarki hans í 100 deildarleikjum. Owen var að sjálfsögðu sáttur við byrjun leiktíðarinnar: "Við höfum unnið tvo heimaleiki í röð á nokkrum dögum og það er alltaf mikilvægt. Liðsheildin er að smella saman og sjálfstraustið eflist eftir þessi úrslit. Hvað mig sjálfan varðar þá gæti ég ekki verið ánægðari og nýt augnabliksins en ég veit af reynslunni hversu fljótt boltinn breytist."

Slæmt höfuðhögg gegn Derby

Það reyndist hverju orði sannara. 15. október í leik gegn Derby fékk hann hné varnarmannsins Chris Riggott af alefli í hausinn á sér og var ljóst að hann hafði fengið heilahristing. Owen segist aldrei hafa orðið eins hræddur á ævi sinni er hann lá á spítalanum eftir höfuðhöggið gegn Derby: "Ég var hræddur. Ég hef meiðst áður en þegar maður meiðist á höfði þá er ástæða til að óttast. Ég man allt þar til ég fékk höggið en eftir það man ég ósköp lítið. Ég man næst eftir mér í búningsherberginu þegar ég fékk sprautu áður en þeir byrjuðu að sauma fyrsta af 13 sporum í hausinn á mér. Mér er sagt að ég hafi staglast á því endalaust að ég vildi fara aftur inná. Þá vissu þeir fyrir víst að ég hefði fengið heilahristing. Móðir mín fylgdi mér í sjúkrabílnum á leið til sjúkrahússins í Derby. Ég rankaði við mér á spítalanum með súrefnisgrímu fyrir andlitinu. Ég fór í röntgenmyndatöku sem sýndi að höfuðkúpan var heil en ég fór síðan til taugasérfræðings í Liverpool. Heilinn á mér var skannaður og þeir sáu að það var mikið blóð og vökvi sem hafði safnast upp við sárið. En þeir töldu þetta ekki of alvarlegt en til öryggis var ég látin vera þar yfir nóttina og fór síðan í aðra skönnun daginn eftir eftir að bólgan hafði hjaðnað. Þetta var algjör martröð. Ég gat varla sofið og það var alltaf verið að athuga blóðþrýstinginn og augun á mér. Ég hef aldrei verið eins áhyggjufullur á ævi minni. Ég var enn að spyrja um úrslit leiksins gegn Derby, hver skoraði og hvernig leikurinn fór. Mamma, pabbi og yngri systir mín voru allan tímann hjá mér. Seinni skönnunin sýndi að það var ekkert til þess að hafa áhyggjur af en ég ímyndaði mér hvað ef þetta hefði verið verra." Owen var útskrifaður af spítalanum og skipað að hvíla sig algjörlega í 10 daga. En erfiðleikunum var ekki lokið. "Ég átti erfitt með að einbeita mér. Ég reyndi að lesa en eftir smástund þá fór allt í móðu. Ég fékk oft hausverk en læknirinn sagði að það væri ekki óvenjulegt. Mér líður ágætlega núna og hef verið að æfa meira undanfarna daga. En það sem fylgdi í kjölfar þessa atviks mun líða mér seint úr minni."

Owen missti úr 5 leiki vegna höfuðmeiðslanna en endurkoma hans 9. nóvember varð heldur skrautleg. Hann kom inná gegn Slovan Liberec í Evrópukeppninni þegar leikklukkan sýndi 81:10. Fyrsta snerting: Michael tók við innkasti frá Nicky. Önnur snerting: Strákur lék út úr teignum framhjá einum eða tveimur varnarmönnum. Þriðja snerting: Drengurinn neglir boltanum í markið frá vítateig. Boltinn lá í markinu þegar fyrrnefnd klukka sýndi 81:31. Það tók drenginn 21 sekúndu að skora. En Owen var ekki beint á skotskónum næstu vikurnar: "Michael hefur skort sjálfstraust síðan hann meiddist á höfði gegn Derby í október og hann var orðinn örvæntingarfullur.", sagði Houllier. 20. janúar meiddist Owen aftur: "Nú er ástandið öllu verra þar sem Michael fann sársauka í hnésbótarsininni undir lok leiksins gegn Middlesborough og hann mun fara í rannsókn í dag til að athuga hversu alvarlegt ástandið er." Houllier var áhyggjufullur og réttilega svo því að Owen var frá í 3 vikur.

TIL BAKA